طلاب معهد التكنلوجيا..استفسار!!

هلا اختي

بدخل انا بعد بالموضوع على طوووول

انا من خريجات معهد الشارقه للتكنولوجيا _ تخصص تصميم فني واعلامي - امتياز مع مرتبه شرف

***
اول شي الدرااسه عندنا كلها بالانجليزي .. نظام بريطاني BETC بتك
النجاح بمستويات هاذي:
D = درجه امتياز بتفوق عالي
M = جيد جدا
P = مقبول
F = راسب (تنحط هالدرجه في حال لو ما قدمتي البروجكت ابدا .. )
في حساب معين لهالدرجات..

الدرااسه مجانيه في الوقت الحالي .. ويمكن يخلونها بفلوس بعدين .. ( على ما انا سمعت من المديره )
عندهم 5 تخصصات:
1- التصوير الفني والاعلامي + الازياء
2- الصحه والرعايه الاجتماعيه
3- التجميل
4- السياحه والسفر ومن ضمنه شي الطبخ
5- IT
6- احتمال يفتحون هالتخصص هو(قسم المجوهرات)
تلتحقين بالمعهد بعد ما تقدمين امتحان الانجليزي والرياضيات ..
اول (شهرين) مب متأكده كمن شهر بالضبط .. تكونين فونديشن .. يعطونج نبذه عن كل تخصص
ومن بعدها تقررين اي تخصص قررتي تتدرسينه
اقدر اتكلم بالتفصيل عن اول 3 تخصصات .. لان نحن 4خوات وكل وحده ماخذه تخصص
التخصص الاول : خذنا في اول سنه كيف التصوير بالتفصيل .. ويوفرلج المعهد كيمره اتكون في العهده طول فتره الدراسه .. ومتى ما احتجتيها.
والسنه الثانيه .. بدينا ندرس ديزاين من اوله .. يعني اول شي نرسم يدوي شخصيات.. مناظر طبيعيه .. تظهرين رحلات وترسمين المنظل الطبيعي اللي يكون جدامج
والادواااااااات كلها يوفرها لج المعهد
من المسطره والمساحه ليييييييييييييين الات الطبااعه والتصوير ..
حتى كراسات التحضير تكون من عند المعهد مع الملفات
يعني الصراحه انا من دخلت المعهد لين ما ظهرت اي شي اساسي ما خذته من مصروفي ..ابداااااا
المهم .. بعد ما خلصنا من الرسم واتقناه باليد .. نبدأ نطبق هالرسومات على الكمبيوتر عن طريق برامج التصميم ..
وكل شي يكون خطوه بخطوه ..
سنتين
السنه الاخير الرابعه .. كانت الدراسه كيف نسوق شغلنا .. وكيف نسوي مشروعنا ونعرضه في معرض خاص فينا ..
والكمبيوترات MAC لكل طالبه كمبيوتر
واعتقد انه الحين من يديد .. دخلوا مع كل تخصص يدرسون اجباري البزنس

التخصص الثاني: كان تخصص اختي .. وبخبرج باللي كنت اشوفه اكثر شي..
تخصص يعتمد على المحاضرات .. وزيارات للمستشفيات .. دار المسنين ... والاماااكن اللي مثل هاي للتدريب طول فتره درااستهم ..
يعني درااستهم تكون مب طب بمعنى الكلمه ..
لا يكون تمهيد لهالتخصص
ما اعرف واايد عنهم
التخصص الثالث: تخصص يعلمج كل شي عن التجميل .. في الصالونات .. وادوات الصالون كلها متوفره ..
واللي كنت اشوفه من هالادوات: كراسي المساج + للمكياج + لغسل الشعر + سشوار +صبغات + منكير بدكير +..الخ
اول شي ياخذون دروس تكون المس تراااهيم كيف يستخدمون الشي اللي مقرر عليهم
بعد ما تحس المس انهم اتمكنوا .. يبدون يطبقون هالشي في الطالبات اللي من التخصصات الثانيه باشراف المس اكيييد
وياما قصينا شعورنا وصبغناهم طول فتره دراستنا .. والسشوار 24 ساعه .. وها كله طبعا في حال لو ما عندنا كلاسات ..

ها بالنسبه للتخصصات ومب بالتفصيل .. بس بشكل عااام
***
مع التخصص اللي تختارينه .. اجباري دراسه البزنس + الايلس + ICDL والامتحانات تكون في المعهد نفسه.. اذا ما نجحتوا فيهم يكون للاعاده دفع بس بنص المبلغ لو عايدينه برع هذا بالنسبه للICDL
اللبس يكون موحد لكل قسم ..
كل قسم له لبس بلون معين .. انا كان لبسي الوردي .. التجميل اخضر فستقي الصحه اكيد ابيض .. باقي التخصصات ما اذكرهم الصراحه
***
اممممممممم بعد عن شو اقوولج؟؟؟؟؟

هيه صح من خلال الدراااسه يسوون فعاليات ومسابقات .. وعليها جوائز حلوه .. واذا كان في مسابقه في الجريده على طول ايبلغونج عنها وتنضمين عن طريق المعهد
بالنسبه للتوصيل .. موفرين باصات مكيفه .. وفي سكن للطالبات للي مناطقهم تكون بعيده تابع لجامعه الشارجه .. بس ما اعرف كيف التعامل ..(مراجعه اداره المعهد )
بعد التخرج ان شاء الله .. يكون في توظيف من المعهد للطالبات المتميزات
وصح نسيت اقولج انه المعهد تابع لهيئه كهرباء ومياه الشارقه
يكون في زيااارات للمتابعه في المعهد
التقييم النهائي للطالبه يكون عن طريق وفد بريطاني تابع لمعهد التكنولوجيا اللي عندهم .. وتكون لهم زياره بين فتره وفتره عشان يدققون في الملفات واذا البنت تستحق هالدرجه أو لأ
****
الصراحه رأي في المعهد .. الحمد الله اني ادرست فيه .. خاااصه ان الدراسه فيه كانت تطبيقيه اكثر من انها تحريريه
تعامل المسات مع الطالبات واااايد اوكي .. والاهم الاداااره صدق ناااجحه .. الله يعطيهم الصحه والعافيه
صدق ما قصروا فينا ابداااااااا في اي اقتراااح او رأي .. حتى لو شكوى ..
مافي شي اسمه مشكله بين المس والطالبه يعني اكيد المس هيه اللي تكون فايزه فيها .. لأ .. لو المس غلطانه تتحااسب .. الغلط غلط ويمشي على الكل
وطبعا ما ننسى لكل هيئه تدريسيه قوانين .. المفروض انا نلتزم فيها .. لانه في النهايه اكيد للدراسه مب للعب وتضيع الوقت

اخيرا تقدرين تشوفين موقع المعهد من على هالرابط .. الموقع انجليزي كله .. وشارحين فيه كل اللي انا قلته لكن بالتفصيل

وما اعرف اذا ممنوع اضيف الرابط .. انا ضفته لو ممنوع يمسحونه >> انزين يعرفون هم ما بيشاورووونج
http://www.sit.ac.ae/Home.asp


لو بغيتي تسألين عن اي شي ثاني فاللللللللج طيب .. لانه اكيد بكون ناسيه اشياء ثانيه .. والسموحه لاني كتبت بدون ترتيب .. اللي في بالي اكتبه على طول هع